I whānau mai, ā, i pakeke mai anō hoki a Hinurewa ki Te Papaioea, he mea kura ki te Kōhanga Reo, Kura Kaupapa (Te Kura Kaupapa o Mana Tamariki), me te Wharekura. He mea whai raihana whakawhiti reo a ia, he whakataki hōtaka pouaka whakaata, he kaiako kura kaupapa, wharekura anō hoki āna mahi i mua, ka mutu kua tutuki nei i a ia tana Tohu Kairangi. He ika a Whiro a ia nō Te Panekiretanga o Te Reo, ā, e rongonui nei a ia hai tohunga wetereo e whakapau nei i ōna kaha ki te whakarauora, ki te whakatairanga anō hoki i te reo Māori – rohe mai, motu mai, ao mai anō hoki.

Kai te kaupapa hoki o te Kura Whakarauora a Hinurewa, e huri nei i te motu ki te āwhina i ngā whānau, i ngā iwi, me ngā hapū ki te whakamahere reo, ki te whakarauora reo. Ko tāna mahi ināianei ko te Pou Reo ki Pouaka Whakaata Māori.