He mea whakatū Te Poutokomanawa Reo Māori mā te hunga āhua matatau tonu ki te reo Māori, e kimi kaupapa ana e pakari kē atu ai te reo, i te āhurutanga o ō rātou ake kāinga, i ngā hāora e pai ana ki a rātou. 

Hei āpiti ki te wherawheratanga o ngā āhuatanga reo e tika ana mō tētehi tohu reo Māori tiketike (pēnei i te ruku hōhonu i te whakakāhoretanga, i te tūmahi oti, i a A rāua ko O, i ngā panonihā, i ētehi pūmahi uaua, tae atu ki ētehi hapa tūroa), kua kuhuna atu ētehi whakatakoto, kīanga, kupu anō hoki me uaua ka kitea, ka rangona i ēnei rā, hei whakahōhonu kē atu i te puna reo o te ākonga. 

Kia tupu ngā hiahia taha reo o te tangata i tōna anō ao kawenga rau, me te ao pōrewharewha e noho nei tātou, karekau pea i tua atu i te kōkō ake i te reo o mua hei hāpai i ngā mahi o muri nei. Ā, hāunga ia te hiahia whaiaro o te tangata ki te whakapakari i a ia ake, arā anō pea ētehi ka kite ake, e, he huarahi pai anō tēnei hei āta pupuhi atu i te hau, i te hā ki ētehi puiaki o te reo kua roa nei e moe ana. 

Ki te kori te tokomaha ki te whakaara ake i ngā mea nei, tērā pea ka hauora anō, kāore e riro tūturu i te moenga roa. Mā konei anō pea e ngākau whiwhita ai ētehi ākonga ki te rangahau, ki te whakahauora i ētehi atu āhuatanga o te reo kua hia ngahuru tau, kāore e poipoia ana e te arero. 

Kia whakataukīhia ake i konei, mō roto i tēnei tohu: 

He tino taonga tēnei mea te tauira. Māna e mau kita ai i te ākonga te tino o te āhuatanga reo e arohia ana. 

Kua whakatakotoria ngā tauira huhua mō ia aronga reo, me kore e tāmaua ki te hinengaro ōna āhuatanga matua. Hei te huhuatanga hoki o ngā tauira kitea ai me pēwhea te mirimiri kia hāngai ake ki te horopaki, kia paku rerekē rānei te tāwara o te kōrero. 

Ko tētehi atu hanga e noho tūāpapa ana ki te tohu nei, ko te āta whakawhirinaki ki ngā tānga kōrero Māori tawhito, pērā i ngā niupepa Māori o ngā rautau e rua ka hori, i Ngā Mōteatea, i Ngā Mahi a ngā Tūpuna, i ngā hautaka Wharekura tawhito, me ētehi atu pukapuka reo Māori ātaahua i tuhia i tērā rautau. 

Ka noho ēnei hei puna kairangi i takea mai ai he tauira tūturu, he tauira papai o te maha atu o ngā whakatakoto pārekareka – o ngā mea e mōhio nuitia ana, me ērā e iti ana te mōhiotia. 

He mataaho hoki aua tauira i kitea ai me pēwhea te whakairo i ngā whakamārama me ngā kupu ārahi mō ētehi o ngā aronga reo. 

Hei whakamāmā i te pīkaunga kei runga i te ākonga, kua hoatu anō hoki he whakapākehātanga o ngā tauira. Whaihoki ngā whakamārama, i te tīmatanga, e reorua ana te katoa. Heoi anō, kia mārō te haere, kia waia haere te ākonga ki te reo whakamārama, ka iti ake te rere o te reo Pākehā, ka waiho mō ngā āhuatanga tuatinitini anahe. 

Kua mahia anō hoki he tauira oro o ngā kōrero mātāmua o ngā akoranga, hei hoa haerekōtui mō te tauira tuhi. E toru ngā hua nui o tēnei. Tuatahi ake, mā konei e wātea ai te tohu nei ki a matahuhua mā e minamana ana ki te kawe ake i te kaupapa nei. Ka rua, ka whakatauirahia te piki, te heke, me te haukaha o te reo e tika ana hei manaaki i ngā kīwaha me ngā tūhau. 

Ka toru, ka uru he wairua whakaari ki roto i ētehi o ngā kōrero paki, kōrero poto o nehe kua kuhuna atu hei kīnaki i ngā akoranga.   



Curriculum

Marautanga

Year One

Calendar

Maramataka

After Graduation

Ka puta te ihu

Ka mutu i te ākonga Te Poutokomanawa Reo Māori, ka pakari ake tōna māia me tōna pūkenga ki te whakamahi i te reo Māori i roto i ngā horopaki huhua. 

Ka āhei ngā paetahi ki te: 

• kōrero me te whakawhiti whakaaro i te reo Māori me te hunga matatau.
• whakamahi i te reo Māori i roto i ngā horopaki mahi, mātauranga, hapori hoki 
• tautoko me te whakatairanga i ngā kaupapa whakarauora reo i roto i ō rātou whānau, hapū, iwi 
• whai wāhi ki ngā kaupapa e whakapakari ana i te reo Māori i roto i ngā whakahaere Māori me ngā hapori. 

He ara anō hoki tēnei tohu ki te whai tonu i ngā akoranga paerunga ake, pērā i e Poutāhū Reo Māori (Postgraduate Diploma in Te Reo Māori) i Te Wānanga o Raukawa. 

why te wānanga o raukawa